फणसाड अभयारण्यात २० ते २२ मार्चला पक्षीगणना
मुरूड, ता. १४ (वार्ताहर) : ग्रीन वर्क्स ट्रस्ट मुंबई यांच्या पुढाकाराने आणि स्टेट बँक ऑफ इंडिया यांच्या सहकार्याने फणसाड अभयारण्यात २० ते २२ मार्च २०२६ या कालावधीत पक्षीगणना कार्यक्रम आयोजित करण्यात आला आहे. या उपक्रमात महाराष्ट्र वन विभाग व ठाणे वन्यजीव विभाग यांचे सहकार्य लाभणार आहे.
या कार्यक्रमात नागरिकांच्या सक्रिय सहभागातून अभयारण्यात आढळणाऱ्या विविध पक्षीप्रजातींचे शास्त्रीय पद्धतीने निरीक्षण व नोंदणी केली जाणार आहे. पक्षीजीवनाच्या संवर्धनासाठी हा उपक्रम महत्त्वाचा मानला जात आहे. कार्यक्रमासाठी इच्छुकांनी नोंदणी करून सहभागी व्हावे, असे आवाहन ट्रस्टचे अध्यक्ष निखिल भोपाळे यांनी केले आहे. निसर्गाच्या सान्निध्यात पक्षी निरीक्षण करत संवर्धनाच्या कार्यात हातभार लावण्याची ही संधी असल्याचेही त्यांनी सांगितले.