उल्हासनगर (वार्ताहर) : अमली पदार्थविरोधी पथक आणि उल्हासनगर पोलिस ठाण्याच्या संयुक्त पथकाने गुटखा विक्रेत्यावर कारवाई करत अटक करण्यात आली आहे. त्याच्याकडून ३१ हजार रुपये किमतीचा मुद्देमाल जप्त केला आहे. पोलिसांच्या माहितीनुसार, उल्हासनगर परिसरात मोठ्या प्रमाणात गुटख्याची अवैध विक्री होत असल्याची माहिती अमली पदार्थविरोधी पथकाला मिळाली होती. त्या आधारे अमली पदार्थविरोधी पथक आणि उल्हासनगर पोलिस ठाण्याने संयुक्त कारवाई करत संबंधित ठिकाणी छापा टाकला. या कारवाईदरम्यान पोलिसांनी गुटखा विक्रेता अब्दुल शेख याला रंगेहाथ पकडले. त्याच्याकडून ३१ हजार रुपये किमतीचा गुटखा आणि इतर साहित्य जप्त केले आहे. दरम्यान, अटक विक्रेत्याविरोधात गुन्हा दाखल केला असून पोलिसांकडून पुढील तपास सुरू आहे.