बोईसर, ता. १७ (वार्ताहर) : आर्थिक वर्ष २०२५-२६ अखेरच्या टप्प्यात महसुली उद्दिष्टपूर्तीस गती देण्यासाठी पालघर जिल्ह्यातील दुय्यम निबंधक कार्यालये सार्वजनिक सुट्टीच्या दिवशीही सुरू ठेवण्याचे आदेश देण्यात आले आहेत.

नोंदणी महानिरीक्षक व मुद्रांक नियंत्रक विभागाच्या निर्देशानुसार २६, २८, २९ व ३१ मार्चला सर्व दुय्यम निबंधक कार्यालये नियमित वेळेत कार्यरत राहणार आहेत. यामध्ये वसई (क्र. १ ते ६), पालघर (क्र. १ व २), डहाणू, तलासरी, वाडा, विक्रमगड, जव्हार आणि मोखाडा येथील कार्यालयांचा समावेश आहे. या निर्णयामुळे नागरिकांना सुट्टीच्या दिवशीही मालमत्ता नोंदणी प्रक्रिया पूर्ण करण्याची सुविधा उपलब्ध होणार आहे. ज्या कार्यालयांची साप्ताहिक सुट्टी शनिवार- रविवारव्यतिरिक्त इतर दिवशी असते, त्या कार्यालयांनी दोन साप्ताहिक सुट्ट्यांपैकी एक दिवस कार्यरत ठेवण्याचे निर्देश देण्यात आले आहेत. कामकाजावर देखरेख ठेवण्यासाठी सहजिल्हा निबंधक व मुद्रांक जिल्हाधिकारी कार्यालयेही या कालावधीत सुरू राहणार असून मुद्रांक शुल्क, अभिनिर्णय आदी प्रलंबित कामे वेळेत पूर्ण करण्यावर भर दिला जाणार आहे.