पाणी समजून चिमुकला प्यायला थिनर

ठाण्यातील घटना; अतिदक्षता विभागात उपचार सुरू

ठाणे शहर, ता. १७ (बातमीदार) : चारवर्षीय बालकाने पाणी समजून थिनर प्यायल्याची घटना इंदिरानगर, ठाणे येथे घडली आहे. त्याला उपचारासाठी ठाणे जिल्हा सामान्य रुग्णालयात दाखल केल्यानंतर छत्रपती शिवाजी महाराज रुग्णालयात हलवण्यात आले असून, अति दक्षता विभागात त्याच्यावर उपचार सुरू असून, प्रकृती स्थिर आहे.

येथील वागळे इस्टेट पोलिस ठाण्याच्या हद्दीत राहणाऱ्या यादव कुटुंबातील या मुलाने सोमवारी सायंकाळी साडेसहाच्या सुमारास घरातील डब्यातील थिनर प्यायल्यानंतर घशात जळजळ होत असल्याने आईला सांगितले. त्यानंतर त्याला पोटात दुखू लागल्याने त्याच्या आईने तत्काळ ठाणे जिल्हा सामान्य रुग्णालयात दाखल केले. तेथून त्याला कळवा येथील छत्रपती शिवाजी महाराज रुग्णालयात दाखल करण्यात आले आहे. जिल्हा रुग्णालयातून पुढील उपचारासाठी हलवताना रुग्णवाहिका उपलब्ध नसल्याने पुकार सेवा प्रतिष्ठान संस्थेने धाव घेत मदत केली.