भिवंडीत बारवर पोलिसांचा छापा; मॅनेजरसह १४ जणांवर गुन्हा दाखल

भिवंडी : भिवंडीतील पारो रेस्टॉरंट अँड बारमध्ये छमछम सुरू असतानाच कोनगाव पोलिसांनी छापा टाकून केलेल्या कारवाईत मॅनेजर, कॅशिअर यांच्यासह १४ जणांच्या विरोधात कोनगाव पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, कोनगाव परिसरातील पारो रेस्टॉरंट अँड बारमध्ये रात्री उशिरापर्यंत छमछम सुरू असल्याची माहिती पोलिसांना मिळाली होती. त्या अनुषंगाने पोलिसांनी शुक्रवारी (ता. १३) रात्री पारो रेस्टॉरंट अँड बारमध्ये छमछम सुरू असतानाच छापा टाकला असता बारमध्ये महिला ग्राहकांना अश्लील हावभाव करून तोकडे कपडे परिधान करून चिथावणी देत असल्याचे उघड झाल्याने याप्रकरणी पोलिस शिपाई विकास श्रीनिवास माने यांनी दिलेल्या फिर्यादीवरून मॅनेजरसह १४ जणांच्या विरोधात कोनगाव पोलिस ठाण्यात गुन्हा दाखल केला आहे.