श्रमदानातून ग्रामविकासाचा नारा
कोळगावमधील शिबिरात ७५ स्वयंसेवक सहभागी

वाणगाव, ता. १८ (बातमीदार) : पद्मश्री जिव्या सोमा मशे औद्योगिक प्रशिक्षण संस्था, वाणगाव (आदिवासी) यांच्या राष्ट्रीय सेवा योजना विभागाच्या वतीने आयोजित निवासी श्रमसंस्कार शिबिर कोळगाव येथे अत्यंत उत्साहपूर्ण वातावरणात पार पडले. या शिबिरात ७५ स्वयंसेवकांनी सहभाग घेतला.
कोळगाव ग्रामपंचायतीचे सरपंच कुणाल पाटील यांच्या हस्ते निवासी श्रमसंस्कार शिबिराचे उद्घाटन झाले. कार्यक्रमाच्या अध्यक्षस्थानी संस्थेचे प्राचार्य सचिन परशुराम संखे उपस्थित होते. कार्यक्रमास ग्रामविकास अधिकारी जितेंद्र पवार तसेच ग्रामपंचायतीचे सदस्य, उपसरपंच किरण संखे, औद्योगिक प्रशिक्षण संस्था पालघरचे अनंत भंगाळे, रोशन संखे, राष्ट्रीय सेवा योजनेचे कार्यक्रम अधिकारी प्रशांत बोकंद, अतिश बारी, प्रशांत पिंपळे, वैभव भोईर, सोमा बेंडकोळी, एस. जी. घरत, रोहित राऊत, सिद्धार्थ विंदे, एस. बी. खताळ, टी. पी. चौधरी उपस्थित होते. या वेळी सरपंच कुणाल पाटील यांनी राष्ट्रीय सेवा योजनेच्या उपक्रमांना प्रोत्साहन देण्यासाठी दहा हजारांची, तर योगेश पाटील यांनी पाच हजारांची आर्थिक मदत जाहीर केली.