इंडियन टॅलेंट ऑलिम्पियाड परीक्षेत शिपूरकर शाळेचे सुयश
माणगाव, ता. १८ (वार्ताहर)ः सुधाकर नारायण शिपूरकर प्री-प्रायमरी अँड प्रायमरी इंग्लिश मीडियम स्कूलच्या विद्यार्थ्यांनी इंडियन टॅलेंट ऑलिम्पियाड परीक्षेत उज्ज्वल यश संपादन केले आहे. विद्यार्थ्यांच्या अथक परिश्रमाला आणि शिक्षकांच्या मार्गदर्शनाला मिळालेला हा सन्मान संपूर्ण माणगावसाठी गौरवाची बाब ठरली आहे.
इंग्लिश ऑलिम्पियाड परीक्षेत चौथीतील विद्यार्थी युक्ती धनंजय जगताप हिने राज्यात अव्वल स्थान पटकावले असून, तिला एक हजार रुपयांची शिष्यवृत्ती प्राप्त झाली आहे. दुसरीतील अर्जुन पवार याने हिंदी ऑलिम्पियाड परीक्षेत राज्यात अव्वल किताब मिळवला असून, त्याला ७०० रुपयांची शिष्यवृत्ती प्राप्त झाली.
पहिलीतील निरव काळे याला पिंक उत्कृष्ट कामगिरीबद्दल, दुसरीतील इरा अतुल फडतरे हिला उल्लेखनीय यशाबद्दल एक्सेलंस मेडल अवॉर्ड प्राप्त झाले. गणित ऑलिम्पियाड परीक्षेत सुधागर गावडा याला उत्कृष्ट कामगिरीबद्दल एक्सेलंस मेडल अवॉर्ड मिळाले. सामान्य ज्ञान ऑलिम्पियाड परीक्षा श्रावणी चव्हाण हिने उत्कृष्ट कामगिरीबद्दल एक्सेलंस मेडल अवॉर्ड प्राप्त केले.
या सर्व विद्यार्थ्यांनी आपल्या जिद्दीने, आत्मविश्वासाने आणि सातत्यपूर्ण प्रयत्नांनी हे यश संपादन करत शाळेचे नाव उंचावले आहे. त्यांच्या या यशामुळे इतर विद्यार्थ्यांमध्येही नवी प्रेरणा निर्माण झाली आहे.