ओसवाल शाळेसमोर नव्या सिमेंट रस्त्याचे खोदकाम
सरावली ग्रामपंचायतीच्या नियोजनावर प्रश्नचिन्ह

सरावली, ता. १८ (वार्ताहर) : सरावली ग्रामपंचायतीमार्फत कोट्यवधी रुपये खर्च करून बांधण्यात आलेल्या सिमेंट काँक्रीट रस्त्याचे ओसवाल परिसरातील ओसवाल शाळेसमोरच खोदकाम करण्यात आल्याचा प्रकार समोर आला आहे. या प्रकारामुळे नागरिकांकडून तीव्र संताप व्यक्त होत आहे. पाइपलाइन टाकण्यासाठी नव्याने तयार रस्ता उकरण्यात आल्याने सार्वजनिक निधीचा उघड अपव्यय झाल्याची टीका नागरिकांच्या वतीने होत आहे.
स्थानिकांच्या म्हणण्यानुसार, संबंधित पाइपलाइनचे नियोजन रस्ता बांधण्यापूर्वीच करणे अपेक्षित होते. मात्र नियोजनाअभावी आधी रस्ता तयार करून नंतर तोच पुन्हा खोदला जात असल्याने ग्रामपंचायतीच्या कामकाजावर प्रश्नचिन्ह उपस्थित झाले आहे.
या प्रकारामुळे नव्या रस्त्याची गुणवत्ता बिघडण्याची शक्यता निर्माण झाली असून, शाळेसमोरील परिसरात नागरिक व विद्यार्थ्यांना ये-जा करताना अडचणींचा सामना करावा लागत आहे. परिणामी, सरावली ग्रामपंचायतीच्या कारभाराबाबत नाराजी व्यक्त होत असून, संबंधितांवर चौकशी करून जबाबदारांवर कठोर कारवाई करण्याची मागणी नागरिकांकडून केली जात आहे.