पनवेल, ता. १८ (वार्ताहर) : भारतीय सैन्यातील ८१ वर्षीय निवृत्त कॅप्टनची एका बांधकाम व्यावसायिकासह त्याच्या दोन मुलांनी मालमत्ता व्यवहारात २२ लाख ८० हजारांची फसवणूक केल्याचे उघडकीस आले आहे. व्यावसायिकाने त्यांना २००६ मध्ये विकलेले दोन भूखंड परस्पर दुसऱ्या व्यक्तींना विकून त्यांची आर्थिक फसवणूक केली आहे. तळोजा पोलिसांनी याप्रकरणी आर. आर. कल्याणकर कन्स्ट्रक्शनचे मालक आणि त्यांच्या दोन मुलांविरोधात गुन्हा दाखल केला आहे.

कॅप्टन संतोष परशुराम शर्मा हे सीबीडी बेलापूर येथे राहण्यास असून, २००६ मध्ये त्यांनी आणि त्यांच्या दोन मुलांनी मिळून तळोजा मजकूर, फेज-२ येथील द्वारका बंगलो स्कीममधील दोन भूखंड आर. आर. कल्याणकर कन्स्ट्रक्शनचे मालक रमेश कल्याणकर यांच्याकडून खरेदी केले होते. यासाठी शर्मा कुटुंबाने त्यांना एकूण २२ लाख ८० हजार रुपये अदा केले होते. तसेच या व्यवहाराची रीतसर नोंदणीही करण्यात आली होती. शर्मा यांनी दोन्ही भूखंडावर झाडे लावून बाग तयार केली होती, तसेच देखभालीसाठी एका व्यक्तीची नेमणूक केली होती. फेब्रुवारीमध्ये देखभालीसाठी गेलेल्या व्यक्तीला भूखंडावर पत्र्याचे शेड मारल्याचे, तसेच झाडे तोडल्याचे दिसून आले. अधिक चौकशी केली असता, हे भूखंड आता दुसऱ्याच्या नावावर असल्याचे समजले. शर्मा यांनी दुय्यम निबंधक कार्यालयात जाऊन माहिती घेतली असता, कल्याणकर यांनी हे भूखंड प्रितपाल सिंह आणि अब्दुल मुनाफ राखे यांना पुन्हा विकल्याचे समोर आले.