पालिकेच्या खोदकामामुळे जलवाहिन्यांचे नुकसान; पाणीगळतीचा धोका
मालाड, ता. १९ (बातमीदार) : मालवणीतील साने गुरुजी वसाहत गेट क्रमांक तीन आणि चार परिसरात पालिकेच्या खोदकामामुळे अनेक जलवाहिन्यांना छिद्र पडल्याचा प्रकार समोर आला आहे. याबाबत स्थानिकांनी कंत्राटदाराला माहिती देऊनही दुर्लक्ष केल्याचा आरोप केला आहे.
नागरिकांच्या मते, या जलवाहिन्यांची तातडीने दुरुस्ती न केल्यास पिण्याच्या पाण्याची मोठ्या प्रमाणावर गळती होण्याची शक्यता आहे. तसेच साने गुरुजी वसाहत गेट क्रमांक दोन ते चारदरम्यान गटाराच्या काँक्रीटीकरणामुळे रस्त्याची उंची सुमारे एक ते दीड फूट वाढली आहे. याउलट, ब्लॉक क्रमांक तीनमधील आतील रस्ता खाली गेल्याने पावसाळ्यात नागरिकांच्या घरात आणि दारात पाणी साचण्याचा धोका निर्माण झाला आहे.
दरम्यान, गटाराच्या कामातही दर्जाबाबत प्रश्नचिन्ह उपस्थित करण्यात येत आहे. नियमानुसार चार फूट खोली असणे अपेक्षित असताना प्रत्यक्षात अडीच ते तीन फूटच खोदकाम करण्यात आल्याचा आरोप स्थानिकांनी केला आहे. यासंदर्भात कंत्राटदाराच्या सुपरवायझरकडे विचारणा केली असता त्यांनी कोणतेही उत्तर देण्यास टाळाटाळ केली तसेच आपले नाव सांगण्यासही नकार दिला. परिसरातील समस्यांकडे तातडीने लक्ष देऊन जलवाहिन्यांची दुरुस्ती आणि कामाची गुणवत्ता तपासावी, अशी मागणी स्थानिक नागरिकांकडून करण्यात येत आहे.