प्रभाग १३० मधील पाणीप्रश्न सभागृहात
घाटकोपर, ता. १९ (बातमीदार) : मुंबईतील अनेक भागांप्रमाणे घाटकोपर प्रभाग क्रमांक १३० मध्येही पाणीपुरवठ्याच्या कमी दाबाचा गंभीर प्रश्न निर्माण झाला असून, हा मुद्दा स्थानिक भाजप नगरसेवक धर्मेश गिरी यांनी सभागृहात मांडला.
घाटकोपर विभागातील या समस्येबाबत गिरी यांनी सातत्याने पाठपुरावा केल्यानंतर जल विभागाकडून माहिती देण्यात आली की, जलवाहिन्यांमध्ये कमी दाब असल्यामुळे नागरिकांना पाणीपुरवठा कमी प्रमाणात होत आहे. विशेषतः घाटकोपर पश्चिमेतील भटवाडी परिसरात साठवण टाकीचे काम सुरू असल्यानेही पाणीपुरवठ्यावर परिणाम होत असल्याचे अधिकाऱ्यांनी स्पष्ट केले. हे काम डिसेंबरमध्ये पूर्ण होणे अपेक्षित होते. त्यानंतर जानेवारी, फेब्रुवारी आणि १५ मार्च अशा वेळा देण्यात आल्या होत्या. आता महापालिकेकडून ३० मार्चपर्यंत काम पूर्ण होईल, अशी नवी मुदत देण्यात आली आहे. सध्या पाण्याच्या तपासणीचे काम सुरू असल्याचे सांगण्यात आले.