भरधाव ट्रक रस्त्यात अडकला
महामार्गावरील निकृष्ट कामाचा तलासरीत भांडाफोड
तलासरी, ता. १९ (बातमीदार) ः मुंबई-अहमदाबाद महामार्गावरील साइडपट्ट्यांवरील निकृष्ट काँक्रीटमुळे भरधाव ट्रक अचानक रस्त्यात अडकला होता. या घटनेमुळे मुंबईकडे जाणाऱ्या वाहिनीवरील निकृष्ट कामाचा भांडाफोड झाला आहे.
महामार्गाच्या दोन्ही बाजूंना गटार खोदण्यात आले होते; मात्र या कामाचा दर्जा चांगला नसल्याचे वारंवार निदर्शनास आले आहे. अशातच गुरुवारी एका ट्रक साइडपट्टीवरून जात असताना अचानक काँक्रीटमध्ये अडकला. या घटनेत सुदैवाने कोणतीही जीवितहानी झाली नाही; मात्र ट्रक अचानक अडकल्याने मागून येणाऱ्या भरधाव वाहनांमुळे मोठा अपघात होण्याची शक्यता होती. महत्त्वाचे म्हणजे, महामार्गावरील बंद पथदिवे, गटारांसंदर्भात स्थानिक नागरिकांनी स्थानिक पोलिस प्रशासनामार्फत महामार्ग प्राधिकरणाबरोबर वेळोवेळी पत्रव्यवहार केला आहे; पण प्रशासन दुर्लक्ष करत आहे.
त्यामुळे महामार्ग प्राधिकरणाच्या दुर्लक्षामुळे भविष्यात मोठा अपघात होण्याची भीती व्यक्त केली जात आहे.