मुंबई विद्यापीठातील स्वतंत्र पाली भवनचे बांधकाम पूर्ण करा
राजकुमार बडोले यांची मागणी
सकाळ वृत्तसेवा
मुंबई, ता. १९ : मुंबई विद्यापीठाच्या संकुलात स्वतंत्र पाली भवनच्या प्रलंबित बांधकामाचा प्रश्न आमदार राजकुमार बडोले यांनी
लक्षवेधीच्या माध्यमातून विधानसभेत उपस्थित केला. यासाठी न्याय आणि रास्त मागणी करणाऱ्या भंतेंवर विद्यापीठ प्रशासनाने अन्यायपूर्वक कारवाई केल्याचा आरोपही त्यांनी केला.
२१ ऑगस्ट २०२५ पासून भंते विमान्सा यांनी पाली भाषेच्या संवर्धनासाठी अनुदान, स्वतंत्र भवन निर्मिती आणि खेडोपाड्यातून उच्च शिक्षणासाठी येणाऱ्या विद्यार्थ्यांसाठी आण्णाभाऊ साठे वसतिगृहाचे नूतनीकरण करण्याची रास्त मागणी केली आहे. मात्र आंदोलनादरम्यान विद्यापीठ परिसरात त्यांना सुरक्षा रक्षकांकडून मारहाण झाली. आंदोलकांविरोधातच गुन्हा दाखल करण्यात आला. कोणतीही नोटीस न देता कायदेशीर प्रक्रिया न पाळता भंते विमान्सा यांचा पीएचडीचा प्रवेश रद्द केला. त्यांचे सामान, पुस्तके वसतिगृहाच्या बाहेर फेकून खोली सील केली. विद्यापीठ प्रशासनाने पोलिसांकडे खोट्या तक्रारी केल्याचा आरोपही बडोले यांनी केला.

चौकशीची मागणी
केंद्रीय अल्पसंख्याक विभागाने मंजूर केलेला निधी पाली विभागाच्या विकासासाठी योग्य प्रकारे वापरला जावा. तो निधी परत गेल्यास याबाबत चौकशी करून दोषींवर कठोर कारवाई करण्यात यावी आणि पाली विभागाला स्वतंत्र भवनसाठी निधी उपलब्ध करून देण्यात यावी, अशी मागणी राजकुमार बडोले यांनी केली.

भंते विमान्सा यांच्या मागण्या अत्यंत छोट्या आणि रास्त आहेत. त्यामुळे यावर तोडगा काढण्याऐवजी आंदोलकांना हुसकावणे अत्यंत चुकीचे आहे. त्यांना न्याय मिळाला पाहिजे.
- राजकुमार बडोले, माजी सामाजिक न्याय मंत्री