महासभेसाठी कडेकोट पोलिस बंदोबस्त
कल्याण, ता. १९ (वार्ताहर) ः कल्याण-डोंबिवली महापालिकेच्या शुक्रवारी (ता. २०) होणाऱ्या महासभेसाठी प्रशासनाने कडेकोट पोलिस बंदोबस्त तैनात करण्याचा निर्णय घेतला आहे. यापूर्वीच्या सभांमध्ये झालेले वाद, धक्काबुक्की आणि नगरसेवकांच्या वाहनांत सापडलेली हॉकी स्टिक्स व दांडकी यांसारखी हत्यारे लक्षात घेऊन हा खबरदारीचा उपाय योजला आहे. या पार्श्वभूमीवर आयुक्त अभिनव गोयल आणि एसीपी कल्याणजी घेटे यांची बैठक पार पडली. अतिरिक्त आयुक्त हर्षल गायकवाड आणि पोलिस अधिकाऱ्यांनी मुख्यालय व सुरक्षा व्यवस्थेचा आढावा घेतला. सोमवारी झालेल्या पहिल्या महासभेतील तपासणीवर नगरसेवक मल्लेश शेट्टी आणि सचिन पोटे यांनी आक्षेप घेतला होता; मात्र कोणताही अनुचित प्रकार टाळण्यासाठी आणि महासभा सुरळीत पार पाडण्यासाठी कडक बंदोबस्त कायम ठेवला जाणार असल्याचे प्रशासनाने स्पष्ट केले आहे.