चिकू, आंबा बागायतदारांचे नुकसान
बोर्डी, ता. २० (बातमीदार) ः वेगवान वाऱ्यामुळे चिकू व आंबा बागायतदारांचे प्रचंड नुकसान झाले आहे. मागच्या १५ दिवसांपासून शहरातील बाजारपेठा वारंवार बंद राहत असल्यामुळे चिकू वेचण्याच्‍या कामात शितलता आली आहे. फळांचे बाजारभाव पडल्यामुळे बागायतदारांना चिकू वेचण्यासाठी मजुरीदेखील महाग पडत असल्यामुळे जवळजवळ शेतीची कामे बंद पडली आहेत. त्यामुळे झाडावरून फळे पिकून पडण्याचे प्रमाणही वाढले आहे. गुरुवारी (ता. १९) रात्री सुटलेल्या वेगवान वाऱ्यामुळे चिकू व आंबा बागायतदारांचे प्रचंड नुकसान झाले आहे. त्याचप्रमाणे चालू हंगामात आंब्याचा मोहोरदेखील येण्याची प्रक्रिया खूपच संत गतीने होती. फेब्रुवारीच्या अखेरीपर्यंत जेमतेम मोहोर आल्याचे चित्र दिसत आहे. अशा परिस्थितीत थोड्याफार प्रमाणात फळे आली असतानाच गुरुवारी रात्री तासभर वेगवान वारे सुटल्याने आंबा आणि चिकूची फळे मोठ्या प्रमाणात गळून पडली आहेत.