कुर्ला नववर्ष यात्रेत ‘स्वदेशी’चा जागर
घाटकोपर, ता. २१ (बातमीदार) : कुर्ला (पश्चिम) येथे आयोजित नववर्ष यात्रेत यंदा ‘स्वदेशी आचार-विचार-प्रचार’ ही संकल्पना प्रभावीपणे मांडण्यात आली. स्वदेशी वस्तूंचा वापर, स्वभाषेचे जतन, पारंपरिक वेशभूषा व खाद्यसंस्कृतीला प्राधान्य, तसेच भारतीय संस्कार आणि पर्यटनस्थळांना प्रोत्साहन देण्याबाबत प्रबोधन करण्यात आले.
भारत नाका येथे स्वदेशी संकल्पनेवर आधारित भव्य व आकर्षक देखावा उभारण्यात आला होता. यात्रेत विविध राज्यांतील पारंपरिक वेशभूषेत लहान मुले, महिला व पुरुष मोठ्या संख्येने सहभागी झाले होते. दि. १९ मार्च २०२६ रोजी सकाळी १० वाजता सर्वेश्वर मंदिर, शिक्षक नगर, जय भवानी चौक आणि गौरीशंकर मंदिर या चार ठिकाणांहून यात्रांना प्रारंभ झाला. भारत नाका येथे सर्व कुर्लेकर एकत्र येऊन ‘वंदे मातरम्’ला १५० वर्ष पूर्ण झाल्याच्या निमित्ताने सामूहिक गायन करून मानवंदना देण्यात आली. ढोल-ताशांच्या गजरात शिवकालीन शस्त्रकला, लेझीम, तसेच लहान मुला-मुलींचे पिरॅमिड यांसारख्या विविध प्रत्यक्षिकांनी उपस्थितांचे लक्ष वेधून घेतले. अखेरीस जागृत विनायक मंदिर येथे महाआरतीने यात्रेची सांगता करण्यात आली.