सरळगाव, ता. २१ (बातमीदार) : मुरबाड तालुक्यातील नवोदित कवी रोहिदास भागवत यांच्या ‘काव्य सुमने’ या काव्यसंग्रहाचे प्रकाशन रसिक श्रोत्यांच्या उपस्थितीत उत्साहात पार पडले. मनातील आर्त भावनांना काव्यरूप देणाऱ्या या संग्रहाला उपस्थितांकडून उत्स्फूर्त प्रतिसाद मिळाला. मुरबाड येथील जिल्हा परिषद शाळा क्रमांक २ मध्ये या सोहळ्याच्या अध्यक्षस्थानी गिरीश कंटे होते. अध्यक्षीय भाषणात त्यांनी कवी रोहिदास भागवत यांना शुभेच्छा देताना, शब्दांची ताकद ब्रह्मांडापेक्षाही मोठी असते. कवीच्या प्रत्येक कवितेतून विचार करायला लावणारी पारदर्शक संवेदना जाणवते, असे मत व्यक्त केले. कोमसाप शहापूर शाखेचे अध्यक्ष विजयकुमार देसले यांनी आपल्या भाषणात कवीला शुभेच्छा देत कवितेचे मर्म उलगडून सांगितले. कार्यक्रमाला मुरबाड कोमसापच्या अध्यक्षा दिपश्री इसामे, लेखक-दिग्दर्शक एकनाथ देसले, कवी प्रकाश फर्डे, कवी जगताप, कृष्णकांत मलिक, कवी संजय गगे-खरीडकर उपस्थित होते.