ऐरोलीत पादचारी पूल उभारण्याची मागणी
येणाऱ्या सर्वसाधारण सभेत अशोक पाटील मांडणार मुद्दा
वाशी, ता. २१ (बातमीदार) : ऐरोली सेक्टर १० येथील ‘गरम मसाला’ परिसर ते सेक्टर १५ मधील डॉ. बाबासाहेब आंबेडकर स्मारकाच्या ठिकाणी नागरिकांच्या सुरक्षिततेसाठी पादचारी पूल उभारण्याची मागणी जोर धरत आहे. स्थायी समिती सभापती अशोक पाटील यांनी येणाऱ्या सर्वसाधारण सभेत हा महत्त्वाचा मुद्दा मांडणार आहेत. सदर मार्गावर मोठ्या प्रमाणात वाहनांची वर्दळ असल्याने पादचाऱ्यांना रस्ता ओलांडताना मोठा धोका निर्माण होत आहे. विशेषतः शालेय विद्यार्थी, महिला आणि ज्येष्ठ नागरिकांना जीव मुठीत धरून रस्ता पार करावा लागत असल्याचे चित्र आहे. त्यामुळे अपघात टाळण्यासाठी या ठिकाणी तातडीने पादचारी पूल उभारण्याची गरज व्यक्त केली जात आहे.
अशोक पाटील हे सर्वसाधारण सभेत यासाठी आवश्यक सर्वेक्षण करून लवकरात लवकर प्रस्ताव मंजूर करण्याची मागणी करणार आहेत. या पुलामुळे नागरिकांना सुरक्षित आणि सुलभ पद्धतीने ये-जा करता येईल, तसेच संभाव्य अपघातांना आळा बसण्यास मदत होईल. स्थानिक नागरिकांनीही या मागणीला पाठिंबा दर्शवला असून, प्रशासनाने तातडीने निर्णय घेऊन प्रत्यक्ष कामाला सुरुवात करावी, अशी अपेक्षा ऐरोलीकरांकडून व्यक्त केली जात आहे.