पनवेल, ता. २१ (बातमीदार) : कळंबोली वसाहतीतील वाढती कोंडी, अतिक्रमण व पार्किंगच्या समस्यांचा प्रत्यक्ष आढावा घेण्यासाठी पनवेल पालिकेच्या महापौरांनी दौरा करावा, अशी मागणी नगरसेवक रामदास शेवाळे यांनी पत्राद्वारे केली आहे.

महापौरपदाची धुरा स्वीकारल्यानंतर हद्दीतील विविध भागांना भेट देऊन नागरिकांच्या समस्या प्रत्यक्ष जाणून घेण्याचा अभिनव उपक्रम सुरू केला आहे. कळंबोली वसाहतीतील प्रभाग क्रमांक आठ, नऊ व दहा या भागांमध्ये सध्या कोंडी, रस्त्यांवरील अतिक्रमण आणि हातगाडीवाल्यांच्या वाढत्या संख्येमुळे नागरिकांना अनेक अडचणींचा सामना करावा लागत आहे. रस्त्यांच्या दोन्ही बाजूंना मोठ्या प्रमाणावर वाहने उभी राहत असल्याने वाहतुकीत अडथळे निर्माण होतात. तसेच हातगाडीवर फळे, खाद्यपदार्थ व इतर वस्तू विक्री करणाऱ्या विक्रेत्यांमुळे वाहतुकीवर परिणाम होत असून अनेक ठिकाणी पदपथांवरही अतिक्रमण झाल्याने नागरिकांना चालण्यासाठीही अडचण निर्माण झाली आहे, असे त्यांनी पत्रात म्हटले आहे.