चिमुकल्यांच्या भक्तिगीतांनी भाविक मंत्रमुग्ध

मुंबई, ता. २१ : विद्यार्थ्यांनी सादर केलेल्या भक्तिगीतांनी भाविक मंत्रमुग्ध झाले. सुमारे तासभर रंगलेल्या या कार्यक्रमाने वातावरण पूर्णतः भक्तिमय झाले.
दादर येथील साने गुरुजी इंग्रजी शाळेतील इयत्ता तिसरी ते आठवीतील सुमारे ४० विद्यार्थ्यांनी संगीत शिक्षक मोहन पवार यांच्या मार्गदर्शनाखाली ‘विठ्ठल नामाचा गजर’, ‘आईसारखे दैवत’, ‘स्वामी समर्थ’, ‘दत्ताचे गीत’ अशी भक्तीगीते सादर केली. कार्यक्रमाची सांगता ‘पसायदान’ने करण्यात आली. या शाळेमध्ये गाण्याची स्वतंत्र तासिका असून, इयत्ता तिसरीपासूनच गायनाचे धडे दिले जातात. त्यानंतर शारदाश्रम मराठी शाळा आणि एसव्हीएम इंटरनॅशनल स्कूलमधील इयत्ता पाचवी ते नववीतील २० ते २५ विद्यार्थ्यांनी संगीत शिक्षिका भक्ती मयेकर यांच्या मार्गदर्शनाखाली सुमधुर भक्तिगीते सादर केली. ‘विठ्ठल...’, ‘देह देवाचे मंदिर’, ‘पांडुरंग... पांडुरंग...’ या गीतांनी वातावरण अधिकच भारावून गेले. या वेळी शारदाश्रम शाळेचे सचिव गजेंद्र शेट्टी यांनी ‘सकाळ’ने उपलब्ध करून दिलेल्या व्यासपीठाबद्दल आभार व्यक्त केले. अशा प्रकारच्या व्यासपीठावर कार्यक्रम सादर करण्याची ही पहिलीच वेळ असल्याचे सांगत हा अनुभव अविस्मरणीय असल्याचे त्यांनी नमूद केले. पुढील वर्षी अधिक जोमाने सहभाग घेऊन कार्यक्रम अधिक भक्तिमय करण्याचा विश्वासही त्यांनी व्यक्त केला.