वाशी (बातमीदार) : नवी मुंबई महापालिकेच्या वतीने महापौरांच्या पदनामाने विविध क्रीडा व सांस्कृतिक स्पर्धांचे नियमित आयोजन केले जाते. या उपक्रमातून शहरातील खेळाडूंना प्रोत्साहन देण्याबरोबरच क्रीडासंस्कृतीला चालना मिळत आहे. याच पार्श्वभूमीवर ४० वर्षांवरील खेळाडूंना व्यासपीठ मिळावे आणि त्यांनी शारीरिकदृष्ट्या तंदुरुस्त राहावे, या उद्देशाने नवी मुंबई महापौर चषक ४०+ क्रिकेट स्पर्धा आयोजित करण्यात आली आहे. ही स्पर्धा सोमवार (ता. २३ ते २५ मार्च) या कालावधीत पार पडणार असून सामने महापालिका मुख्यालयाजवळील मैदानावर खेळविण्यात येणार आहेत. या स्पर्धेत नवी मुंबईतील ३० गावांमधील ३३ संघांसह शहरी भागातील २५ संघ सहभागी होणार आहेत, असे क्रीडा व सांस्कृतिक कार्यक्रम समितीचे सभापती गिरीश म्हात्रे यांनी सांगितले.