ऑल इंडिया विद्यापीठ तायक्वांदो स्पर्धेत
आर्यन येवले याला कांस्यपदक

घाटकोपर, ता. २३ (बातमीदार) : जालंधर (पंजाब) येथे १६ ते २० मार्चदरम्यान झालेल्या ऑल इंडिया विद्यापीठ तायक्वांदो स्पर्धेत आर्यन येवले याने कांस्यपदक पटकावून मुंबईचा गौरव वाढविला आहे.
या स्पर्धेत देशभरातील २५० हून अधिक विद्यापीठांनी सहभाग नोंदविला होता. यापूर्वी रत्नागिरी येथे ३ ते ५ जानेवारीला झालेल्या आंतरविद्यापीठ तायक्वांदो स्पर्धेत खालसा कॉलेज, माटुंगा येथून आर्यनची निवड झाली होती. त्यानंतर ६८ किलोखालील वजनी गटात त्याची मुंबई विद्यापीठ संघात निवड करण्यात आली. या गटात दमदार कामगिरी करत आर्यनने कांस्यपदक जिंकले. त्याला आंतरराष्ट्रीय तायक्वांदो प्रशिक्षक राजेश मुरव आणि संदीप येवले यांचे मार्गदर्शन लाभत आहे.
या यशाबद्दल तायक्वांदो असोसिएशन ऑफ महाराष्ट्रचे महासचिव मिलिंद पठारे, सचिव सुभाष पाटील, अध्यक्ष अविनाश बारगजे तसेच खजिनदार व्यंकटेश कररा यांनी त्याचे अभिनंदन केले आहे.