रासायनिक सांडपाण्याने नाकीनऊ
तारापूरमधील नाल्यातून विसर्ग, दुर्गंधीने नागरिक हैराण

बोईसर, ता. २३ (वार्ताहर) : तारापूर औद्योगिक क्षेत्रात रासायनिक सांडपाणी थेट नैसर्गिक नाल्यांमध्ये सोडले जात आहे. परिणामी, परिसरात दुर्गंधी पसरली असून प्रदूषणाची पातळी धोकादायक पातळीवर गेली आहे.
तारापूर औद्योगिक क्षेत्रात कारखान्यांमधील सांडपाणी चेंबरमार्फत वाहून नेण्याची व्यवस्था आहे; मात्र चेंबर रासायनिक पाण्याने भरून ओसंडून वाहत असल्याने पाणी बाहेर पडत आहे. त्याचा थेट परिणाम स्थानिक नागरिकांच्या आरोग्यावर होत आहे. या पार्श्वभूमीवर पर्यावरणीय नियम व कायदे केवळ कागदोपत्रीच राहिल्याचे चित्र दिसत आहे. संबंधित प्रशासन व नियंत्रण यंत्रणा नेमकी कोणती भूमिका बजावत आहेत, याबाबत प्रश्नचिन्ह उपस्थित होत आहे. वारंवार तक्रारी करूनही कोणतीही ठोस कारवाई होत नसल्याने नागरिकांमध्ये तीव्र संताप व्यक्त होत आहे.
--------------
आरोग्याशी खेळ
वाढत्या प्रदूषणाच्या पार्श्वभूमीवर प्रशासनाने तातडीने हस्तक्षेप करून नियमांची काटेकोर अंमलबजावणी करावी, अन्यथा तारापूर परिसरात गंभीर पर्यावरणीय, आरोग्य संकट निर्माण होण्याची भीती व्यक्त केली जात आहे.
विकासाच्या नावाखाली नागरिकांच्या आरोग्याशी खेळ सुरू असल्याची भावना स्थानिकांमध्ये वाढत आहे. संबंधित कारखान्यांवर कठोर कारवाई करून अशा प्रकारांना आळा घालण्यासाठी प्रभावी उपाययोजना करण्याची मागणी जोर धरत आहे.