वाशी, ता. २३ (बातमीदार) : नवी मुंबई महापालिकेच्या प्रभाग क्रमांक २४ मधील बामणदेव मैदानावर सुरू असलेल्या फॉर्म्युला फोर रेसिंग ट्रॅक प्रकल्पावरून सर्वसाधारण सभेत तीव्र वाद निर्माण झाला. नगरसेवक अनिकेत म्हात्रे यांनी या प्रकल्पावर जोरदार आक्षेप घेतला.

बामणदेव मैदान हे अनेक वर्षांपासून स्थानिक नागरिकांसाठी क्रीडा, व्यायाम आणि शारीरिक तंदुरुस्तीचे केंद्र राहिले आहे. अशा महत्त्वाच्या सार्वजनिक मैदानावर रेसिंग ट्रॅक उभारण्याचा निर्णय घेताना स्थानिकांच्या गरजांकडे दुर्लक्ष करण्यात आले आहे. नेरूळ गावावर सध्या ही परिस्थिती ओढवली असून भविष्यात इतर गावांवरही अशीच वेळ येऊ शकते, अशी भीती व्यक्त करत त्यांनी हा प्रकल्प तत्काळ थांबवण्याची मागणी केली. तसेच रेसिंग ट्रॅकसाठी नेमके हेच मैदान कोणत्या निकषांवर निवडण्यात आले, पर्यायी जागांचा विचार का करण्यात आला नाही, असा प्रश्न त्यांनी उपस्थित केला. विकासाच्या नावाखाली सार्वजनिक क्रीडा सुविधा नष्ट होऊ नयेत, अशी मागणी त्यांनी केली.

अनिकेत म्हात्रे यांनी स्पष्ट केले, की पुनर्विकासाच्या आश्वासनांपेक्षा आधी मैदानाचे मूळ अस्तित्व टिकवणे महत्त्वाचे आहे. त्यांनी प्रशासनाला पारदर्शक भूमिका मांडण्याचे आवाहन करत नागरिकांच्या हिताला प्राधान्य देण्याची मागणी केली. गिरीश म्हात्रे यांनी प्रस्ताव मांडला होता. या प्रस्तावात फॉर्म्युला फोर स्पर्धा पूर्ण झाल्यानंतर संबंधित मैदानाचा सार्वजनिक क्रीडांगण म्हणून पुनर्विकास करण्याची मागणी करण्यात आली आहे.