महिलेचा खून करून मृतदेह झुडपात फेकला

वज्रेश्वरी, ता. २३ (बातमीदार) : परिसरातील शिरवली गावात एका महिलेचा खून करून तिचा मृतदेह झुडपात फेकल्याची घटना उघडकीस आली आहे. वज्रेश्वरी-शिरसाड मार्गालगत असलेल्या शिरवली गावाच्या हद्दीत एका महिलेचा खून करून तिचा मृतदेह लपवण्याच्या हेतूने झाडाझुडपात फेकल्याची घटना समोर आली.
ही घटना शुक्रवारी (ता. २०) रात्री घडल्याचा प्राथमिक अंदाज असून, शनिवारी दुपारी ती उघडकीस आली. स्थानिकांना झुडपात मृतदेह दिसून आल्यानंतर त्यांनी तत्काळ पोलिसांना माहिती दिली. मांडवी पोलिसांच्या प्राथमिक तपासात महिलेच्या डोक्यात दगडाने वार करून तिची हत्या करण्यात आल्याचा संशय व्यक्त करण्यात आला आहे. मृत महिलेची ओळख अद्याप पटलेली नसून, तिची माहिती मिळवण्यासाठी पोलिसांकडून प्रयत्न सुरू आहेत. मृतदेह शवविच्छेदनासाठी पाठवला असून, याप्रकरणी अज्ञाताविरोधात गुन्हा दाखल करण्यात आला आहे.