पनवेल, ता. २४ (बातमीदार) : केरळ विधानसभा निवडणुकीच्या रणधुमाळीत कासरगोड मतदारसंघात एनडीए आघाडीने मोठे शक्तिप्रदर्शन करत उमेदवार अश्विनी एम. एल. यांनी उमेदवारी अर्ज दाखल केला. याप्रसंगी भाजपचे महाराष्ट्र प्रदेश चिटणीस आमदार प्रशांत ठाकूर यांची प्रभारी म्हणून प्रमुख उपस्थिती होती. उमेदवारी अर्ज भरण्यापूर्वी काढण्यात आलेल्या रॅलीमध्ये कार्यकर्त्यांचा उत्साह शिगेला पोहोचला होता. ढोल-ताशांचा गजर, ‘भारत माता की जय’च्या घोषणा आणि हातात भाजपचे झेंडे घेतलेले हजारो समर्थक रस्त्यावर उतरले होते. मतदारांचा वाढता पाठिंबा आणि कार्यकर्त्यांमधील जोश पाहता, या मतदारसंघात या वेळी निश्चितपणे परिवर्तन होऊन भाजप महायुतीचा विजय होईल, असा ठाम विश्वास आमदार प्रशांत ठाकूर यांनी व्यक्त केला. या वेळी पनवेलचे नगरसेवक संतोष शेट्टी, शिवाजी भगत, अक्षय सिंह, जयचंद्रन वासू, शिवाजी शेट्टी, सुभाष शेट्टी, अभिलाष शेट्टी, सुजित पुजारी आदी उपस्थित होते.