बस पास योजनेसाठी ३१ मार्चची मुदत
विरार (बातमीदार) ः वसई-विरार पालिकेच्या परिवहन सेवेच्या बस प्रवास योजनेंतर्गत दिल्या जाणाऱ्या मोफत पासची मुदत मार्चअखेरीस संपुष्टात येणार आहे. त्यामुळे लाभार्थ्यांना नव्या पाससाठी अर्ज करण्याचे आवाहन करण्यात आले आहे.
वसई-विरार पालिकेच्या परिवहन सेवेमार्फत शहरातील ३७ मार्गांवर सेवा पुरवली जाते. शहरांतर्गत प्रवास करणारे हजारो प्रवासी दररोज परिवहन सेवेच्या बसमधून प्रवास करतात. ज्येष्ठ नागरिक, अपंग, कर्करोगपीडित, डायलिसिसचे रुग्णांना मोफत बस प्रवास योजनेंतर्गत विशेष पास दिला जातो. त्यामुळे लाभार्थांनी नव्या पाससाठी अर्ज करण्याचे आवाहन पालिकेकडून करण्यात आले आहे. बस पास सुविधा सुरू ठेवण्यासाठी लाभार्थ्यांना नवीन अर्ज भरणे बंधनकारक आहे. जुना पास जमा केल्यानंतरच नवीन पास दिला जाणार आहे.