ग्रामपंचायतींमध्ये आता ‘बायोमेट्रिक शिस्त’
पंचायत समिती प्रशासनाचा कडक निर्णय
टिटवाळा, ता. २५ (वार्ताहर) : कल्याण तालुक्यातील ग्रामपंचायतींमधील अधिकारी आणि कर्मचाऱ्यांच्या कामचुकारपणाला आता चाप बसणार आहे. कार्यालयीन वेळेत दांड्या मारणाऱ्या कर्मचाऱ्यांवर अंकुश ठेवण्यासाठी सर्व ग्रामपंचायतींमध्ये बायोमेट्रिक हजेरी प्रणाली तत्काळ लागू करण्याचे आदेश पंचायत समितीने दिले आहेत. सामाजिक कार्यकर्ते विशाल शांताराम कुरकुटे यांनी केलेल्या पाठपुराव्यानंतर प्रशासनाने हा महत्त्वपूर्ण निर्णय घेतला आहे.

तालुक्यातील अनेक ग्रामपंचायतींमध्ये कर्मचारी वेळेवर हजर राहत नसल्याच्या तक्रारी वाढल्या होत्या. यामुळे सामान्य नागरिकांना साध्या कामांसाठी वारंवार हेलपाटे मारावे लागत होते. प्रशासकीय कामात अनागोंदी निर्माण होऊन विकासकामे रेंगाळली होती. त्यामुळे कर्मचाऱ्यांच्या अनुपस्थितीमुळे जनतेमध्ये असंतोष होता.

विशाल कुरकुटे यांच्या लेखी तक्रारीची दखल घेत पंचायत समितीने कडक पावले उचलली आहेत. प्रत्येक अधिकारी व कर्मचाऱ्यांना आता बायोमेट्रिक मशीनवर अंगठा लावणे बंधनकारक असेल. हजेरी प्रणालीत फेरफार किंवा नियमांचे उल्लंघन केल्यास संबंधित कर्मचाऱ्यांवर कठोर प्रशासकीय कारवाई केली जाईल. या निर्णयामुळे ग्रामपंचायत स्तरावरील कामकाजात पारदर्शकता आणि जबाबदारीची भावना निर्माण होणार आहे. नागरिकांना वेळेत सेवा मिळावी आणि सरकारी यंत्रणेवरील विश्वास दृढ व्हावा, हाच या बायोमेट्रिक सक्तीमागील मुख्य उद्देश आहे, असे पंचायत समिती प्रशासनाने स्पष्ट केले आहे.

नागरिकांमध्ये समाधानाचे वातावरण
सरकारी कार्यालयातील ढिम्म कारभारावर अंकुश ठेवण्यासाठी उचललेले हे पाऊल स्वागतार्ह मानले जात आहे. काम करा अन्यथा कारवाईला सामोरे जा, असा स्पष्ट संदेश यानिमित्ताने प्रशासनाने दिला आहे.