मुरबाड (वार्ताहर) : तालुक्यातील नारिवली येथे १९७७ मध्ये सुरू झालेला अखंड हरिनाम सप्ताह यंदा सुवर्ण महोत्सवी वर्षात पदार्पण करत आहे. यानिमित्त विविध धार्मिक कार्यक्रम होणार आहेत. या सुवर्ण महोत्सवी सप्ताहात महाराष्ट्रातील नामवंत कीर्तनकारांची कीर्तन होणार आहे. यात चैतन्य महाराज देगलूरकर, जयवंत महाराज बोधले, योगीराज महाराज गोसावी, भगीरथ महाराज काळे, जगन्नाथ महाराज पाटील, विश्वनाथ महाराज वारिंगे आदी कीर्तनकार संत साहित्याचा महिमा रसिकांसमोर मांडणार आहेत. तसेच ह.भ.प. राजाराम महाराज घावट यांचे संतश्रेष्ठ जगद्‍गुरू तुकाराम महाराज यांच्या जीवनावर आधारित संगीतमय चरित्र प्रवचन होणार आहे. तालुक्यातील विविध सप्ताह मंडळांचा सन्मानही करण्यात येणार आहे. रामनवमी ते हनुमान जयंती या कालावधीत हा सुवर्ण महोत्सवी सप्ताह पार पडणार आहे. भाविकांनी संत-सज्जनांचा आशीर्वाद व श्रवणसुखाचा लाभ घ्यावा, असे आवाहन नारिवली ग्रामस्थांच्या वतीने करण्यात आले आहे.