अल्पवयीन मुलीवर कोयत्याने हल्ल्याचा प्रयत्न
मुलुंडमधील घटना; आरोपी २४ तासांत जेरबंद

घाटकोपर, ता. १ (बातमीदार) : मुलुंड परिसरात अल्पवयीन मुलीवर जीवघेणा हल्ला करण्याचा प्रयत्न झाल्याची धक्कादायक घटना समोर आली आहे. याप्रकरणी मुलुंड पोलिसांनी अवघ्या २४ तासांत आरोपीला अटक करीत तत्पर कारवाई केली.
पोलिसांनी दिलेल्या माहितीनुसार, १६ वर्षीय पीडित मुलगी आणि आरोपी आशीष गौतम बनसोडे (वय २१, रा. बदलापूर पूर्व) यांची पूर्वीपासून ओळख होती. मंगळवारी (ता. २५) सकाळी ९ वाजता मुलगी कॉलेजसाठी मुलुंड येथे आली असता आरोपीने तिचा पाठलाग करून तिला अडवले.
या वेळी ‘तू माझ्याशी का बोलत नाहीस?’ असा जाब विचारत आरोपीने मुलीच्या गळ्यात पाठीमागून हात टाकला आणि लोखंडी कोयत्याने वार करण्याचा प्रयत्न केला. दरम्यान, मुलीचा मित्र मध्ये पडताच त्याच्या मानेच्या मागील बाजूस कोयत्याचा वार लागून तो जखमी झाला.
हल्ल्यानंतर आरोपीने मुलीला जीवे मारण्याची धमकी देत शिवीगाळ केली. या घटनेमुळे परिसरात काही काळ भीतीचे वातावरण निर्माण झाले होते. पीडितेच्या तक्रारीवरून मुलुंड पोलिस ठाण्यात भारतीय न्याय संहिता कलम १०९, ११८(१), ७८, ३५१(३) तसेच भारतीय हत्यार कायदा कलम ४, २५ आणि महाराष्ट्र पोलिस कायदा कलम ३७(१)/१३५ अन्वये गुन्हा दाखल करण्यात आला आहे.
तपासादरम्यान पोलिसांनी आरोपीला २४ तासांत अटक केली असून त्याच्याकडून गुन्ह्यात वापरलेला लोखंडी कोयता जप्त करण्यात आला आहे. आरोपीला न्यायालयात हजर करण्यात येणार आहे. त्याच्यावर यापूर्वीही बदलापूर पोलिस ठाण्यात एनडीपीएससह इतर गंभीर गुन्हे नोंद असल्याची माहिती पोलिसांनी दिली. या प्रकरणाचा पुढील तपास मुलुंड पोलिस करीत आहेत.