भोंदूबाबा खरातविरोधात मालाडमध्ये जोड मारो आंदोलन
मालाड, ता. २६ (बातमीदार) : नाशिक येथील भोंदूबाबा अशोक खरात याच्याविरोधात मालाडमध्ये तीव्र निषेध आंदोलन करण्यात आले. आरपीआय (ए.) मालाड विधानसभा यांच्या वतीने मालाड स्टेशन परिसरात जोडे मारो आंदोलन करण्यात आले.
आंदोलनकर्त्यांनी आरोप केला, की अशोक खरात याने शेकडो महिलांना कथितरीत्या स्वतःचे मूत्र पाजून अमानवी कृत्य केले आहे. या घटनेच्या निषेधार्थ त्याच्या प्रतिमेला जोडे मारो करीत संताप व्यक्त करण्यात आला. हे आंदोलन मालाड विधानसभा अध्यक्ष सुनील गमरे यांच्या नेतृत्वाखाली पार पडले. आंदोलनकर्त्यांनी आरोपी अशोक खरात याच्यावर तातडीने गुन्हा दाखल करून कठोर शिक्षा करण्याची मागणी केली. तसेच या प्रकरणातील इतर जबाबदार व्यक्तींवरही गुन्हे नोंदवून कडक कारवाई करावी, अशी मागणी करण्यात आली. शासनाने त्वरित कारवाई न केल्यास आंदोलन अधिक तीव्र करण्याचा इशारा या वेळी देण्यात आला. या निषेध आंदोलनात प्रकाश बनसोडे, आयुष सिंग, सत्यदेव बाबू चव्हाण, मालती कटाळे, अश्विनी गोसावी, मीना कदम यांच्यासह अनेक कार्यकर्ते सहभागी झाले होते.