वज्रेश्वरी, ता. २६ (बातमीदार) : सेवेचा संकल्प प्रत्यक्ष कृतीत उतरवत श्रमजीवी संघटनेतर्फे दर महिन्याच्या २३ तारखेला राबवला जाणारा ‘सेवा दिन’ भिवंडी तालुक्यासह ठाणे जिल्ह्यातील श्रमजीवीबहुल भागात उत्साहात आणि शिस्तबद्ध पद्धतीने साजरा करण्यात आला. गाव-पाड्यांपासून शासकीय कार्यालयांपर्यंत स्वच्छतेचा संदेश देत या उपक्रमाने सामाजिक बांधिलकीची ठोस जाणीव निर्माण केली.

भिवंडी तालुक्यातील अंबाडी, चिंबीपाडा आदी ग्रामीण भागांमध्ये जिल्हा परिषद शाळा, प्राथमिक आरोग्य केंद्रे, ग्रामपंचायत कार्यालये; तसेच आश्रमशाळांमध्ये व्यापक स्वच्छता मोहीम राबवण्यात आली. या मोहिमेत कार्यकर्त्यांसह महिला-पुरुष सभासद, युवक आणि लहान मुलांनीही मोठ्या संख्येने सहभाग घेतला. पंचायत समिती कार्यालयात आदिवासी विकास आढावा समितीचे अध्यक्ष (मंत्री दर्जा) विवेक पंडित यांनी स्वतः शौचालय स्वच्छ करून ‘सेवा हीच सर्वोच्च मूल्य’ असल्याचा आदर्श कृतीतून दाखवून दिला. त्यांच्या या कृतीमुळे उपस्थितांमध्ये सेवा भाव अधिक दृढ झाल्याचे दिसून आले. विवेक पंडित यांच्या वाढदिवसानिमित्त २३ ऑगस्ट हा ‘सेवा दिन’ म्हणून साजरा केला जातो. त्याच प्रेरणेतून दर महिन्याच्या २३ तारखेला विविध सेवा उपक्रम राबवण्याची परंपरा संघटनेने जपली असून, यंदाही त्याचे प्रभावी स्वरूप पाहायला मिळाले. या उपक्रमातून स्वच्छता, सामाजिक जबाबदारी आणि सेवा भाव यांचे महत्त्व अधोरेखित झाले.