अंबरनाथ, ता. २६ (वार्ताहर) : अंबरनाथमध्ये महिलांच्या टोळीची हातचलाखी पुन्हा एकदा समोर आली आहे. एका साडी दुकानातून साड्यांचे बंडल लंपास केल्याची घटना घडली आहे. अंबरनाथ पूर्व येथील ग्रीन सिटी परिसरातील एका साडी दुकानात काही महिला साड्या खरेदी करण्याच्या बहाण्याने आल्या. सुरुवातीला त्यांनी विविध साड्या पाहत दुकानदाराला गुंतवून ठेवले. त्याचवेळी इतर महिलांनी संधी साधत दुकानातील साड्यांचे एक बंडल हातचलाखीने लंपास केले. हा संपूर्ण प्रकार दुकानातील सीसीटीव्ही कॅमेऱ्यात कैद झाला आहे. घटनेनंतर दुकानदाराने तत्काळ शिवाजीनगर पोलिस ठाण्यात धाव घेऊन तक्रार नोंदवली. पोलिसांनी अज्ञात महिलांविरोधात गुन्हा दाखल करून सीसीटीव्ही फुटेजच्या आधारे तपास सुरू केला आहे.