ठेकेदारांचे उपोषण स्थगित
आमदार थोरवे यांच्या आश्वासनानंतर निर्णय; थकीत देयके एप्रिलपासून देण्याचे संकेत
कर्जत, ता. २६ (बातमीदार) : कर्जत तालुक्यातील ठेकेदार असोसिएशनचे बेमुदत उपोषण दुसऱ्या दिवशी स्थगित करण्यात आले. उपोषणकर्ते राहुल डाळिंबकर यांनी आमदार महेंद्र थोरवे यांच्या हस्ते रस घेऊन उपोषण सोडले. यावेळी सा.बा. विभाग पनवेलचे कार्यकारी अभियंता संदीप चव्हाण यांच्यासह संघटनेचे पदाधिकारी व सदस्य उपस्थित होते.
दीड वर्षांपासून सुमारे २०० कोटी रुपयांहून अधिक देयके थकीत असल्याने ठेकेदारांनी २५ मार्चपासून सार्वजनिक बांधकाम विभाग कार्यालयासमोर उपोषण सुरू केले होते. प्रलंबित बिलांमुळे आर्थिक अडचणी निर्माण झाल्याची त्यांनी व्यथा मांडली होती.
दरम्यान, कार्यकारी अभियंता संदीप चव्हाण यांनी एप्रिलपासून थकीत रक्कम देण्यास सुरुवात करण्यात येईल, असे आश्वासन दिले. तसेच आमदार थोरवे यांनी हा प्रश्न विधानसभेत मांडण्याचे सांगितले. या आश्वासनांवर विश्वास ठेवून ठेकेदारांनी उपोषण स्थगित करण्याचा निर्णय घेतला.