पडघा (बातमीदार) : भिवंडी तालुक्यातील पडघा येथे गुरुवारी पहाटे भरधाव कंटेनर उलटल्याची घटना घडली. ही घटना पहाटे घडल्याने जीवितहानी टळली; मात्र कंटेनरचे मोठे नुकसान झाले आहे. महामार्गावर मुंबईकडून नाशिककडे जाणारा कंटेनर शहापूर-वासिंद मार्गाकडे वळताना पडघ्यात रस्त्यावर उलटला. घटनास्थळ दिवसा नेहमीच गजबजलेले असते. येथे फळविक्रेते, आईस्क्रीम, सरबत व सुकी मच्छी विक्रेते हातगाड्या लावून व्यवसाय करत असतात. अनेक वाहनचालक याच मार्गाने महामार्गावर ये-जा करतात. त्यामुळे ही घटना दिवसा घडली असती तर मोठी दुर्घटना घडली असती, अशी प्रतिक्रिया स्थानिक नागरिकांनी व्यक्त केली. पहाटे कंटेनर उलटताना मोठा आवाज झाल्याचे आजूबाजूच्या नागरिकांनी सांगितले.