दुपारच्या उन्हाने
ठाणेकर हैराण

सकाळ वृत्तसेवा
ठाणे, ता. २७ ः ठाणे शहरात उन्हाचा तडाखा दिवसेंदिवस वाढल्याचे दिसून येत आहे. आज दुपारी शहरात तापमान ३९ अंशांवर गेले होते. त्यात रस्त्याने जाताना नागरिकांना उन्हाच्या झळाही सोसाव्या लागत होत्या.
मार्चच्या पहिल्या आठवड्यात तापमानाने तब्बल ४० अंश सेल्सिअसचा टप्पा गाठला होता. त्यामुळे दुपारच्या वेळेत घराबाहेर पडणे ठाणेकरांसाठी त्रासदायक ठरत होते; मात्र त्यानंतर राज्यातील काही भागात अवकाळी पाऊस झाल्याने उन्हाचा पारा ३० ते ३२ अंशांवर आला; मात्र मागील तीन ते चार दिवसांपासून उन्हाची तीव्रता पुन्हा वाढू लागली आहे. याच कालावधीत उन्हाचा पारा ३५ ते ३९ अंशांवर गेल्याचे दिसत आहे. त्यामुळे दुपारच्या सत्रात फिरताना उन्हाचे चटके जाणवत आहेत. येत्या काही दिवसांत तापमानात आणखी वाढ होण्याची शक्यता व्यक्त केली जात आहे. त्यामुळे यंदाचा उन्हाळा ठाणेकरांसाठी अधिक त्रासदायक ठरण्याची चिन्हे दिसू लागली आहेत.