सकाळ वृत्तसेवा
ठाणे, ता. २९ : ठाणे महापालिकेमार्फत टीएमटी बस प्रवासासाठी ज्येष्ठ नागरिकांना डिजिटल बस पास काढणे बंधनकारक करण्यात आले आहे. मात्र, ही प्रक्रिया खर्चिक व त्रासदायक आहे. ज्येष्ठांना सवलत देण्यासाठी सुरू करण्यात येणाऱ्या डिजिटल बस पासऐवजी आधार कार्ड ग्राह्य धरावे, अशी मागणी ठाणे जिल्हा पेन्शनर असोसिएशनने पालिका आयुक्त सौरभ राव यांच्याकडे निवेदनाद्वारे केली.
केंद्र सरकारकडून दिल्या जाणाऱ्या आधार कार्डमध्ये नागरिकाची सर्व आवश्यक माहिती उपलब्ध असते. त्यामुळे नवीन डिजिटल पास काढण्याची सक्ती करण्यामागे कोणतेही ठोस कारण नाही. यामुळे ज्येष्ठ नागरिकांवर अतिरिक्त आर्थिक व मानसिक ताण येत असल्याची खंत व्यक्त केली जात आहे. डिजिटल बस पाससाठी दरवर्षी ७७ रुपये शुल्क आकारले जात असून, पास मिळवण्यासाठी नागरिकांना मोठ्या रांगेत उभे राहावे लागते. विशेषतः उन्हाळ्यात तासन् तास प्रतीक्षा करावी लागत असल्याने ज्येष्ठांच्या आरोग्यावर विपरीत परिणाम होण्याची भीती व्यक्त केली जात आहे. ठाणे जिल्हा पेन्शनर असोसिएशनचे उपाध्यक्ष शिरीष नागले यांनी याबाबत ठाणे पालिका प्रशासनाकडे निवेदन सादर केले आहे. डिजिटल बस पासची सक्ती तत्काळ रद्द करून आधार कार्डालाच वैध ओळखपत्र म्हणून मान्यता द्यावी, अशी मागणी त्यांनी केली आहे. याप्रकरणी प्रशासनाने सहानुभूतीपूर्वक विचार करून ज्येष्ठ नागरिकांना दिलासा देणारा निर्णय घ्यावा, अशी अपेक्षा व्यक्त होत आहे.