पोहण्याचा मोह जीवावर
जीआयपी धरणामध्ये बुडून एकाचा मृत्यू

अंबरनाथ, ता. २९ (वार्ताहर) ः पूर्वेतील जीआयपी धरणामध्ये अंघोळीसाठी गेलेल्या एकाला पाण्याच्या खोलीचा अंदाज आला नसल्याने बुडून मृत्यू झाला आहे. या घटनेनंतर नागरिकांनी अशा धोकादायक ठिकाणी पोहण्याचा मोह टाळावा, असे आवाहन प्रशासनाने केले आहे.
वाढत्या उष्णतेमुळे शंकर थापा (३५) अंघोळीसाठी शनिवारी (ता. २८) धरणामध्ये उतरला होता; मात्र पाण्याच्या खोलीचा अंदाज चुकल्याने बुडून मृत्यू झाला. घटनेची माहिती मिळताच अंबरनाथ अग्निशमन दलाच्या जवानांनी शोधमोहीम राबवून मृतदेह शिवाजीनगर पोलिसांच्या ताब्यात दिला. या घटनेमुळे धरणात पोहण्याचा मोह जीवावर बेतला आहे.
----------------------------
सुरक्षेचा अभाव
काकोळे गावाजवळील मध्य रेल्वेच्या मालकीचा जीआयपी तलाव पुन्हा चर्चेत आला आहे. या तलावाभोवती सुरक्षित कुंपण नसल्याने दरवर्षी अशा घटना घडत आहेत. त्यामुळे तलावाच्या सुरक्षेच्या अनुषंगाने उपाययोजना करण्याची मागणी होत आहे.