आरसीएफ कंपनीच्या वतीने विद्यार्थ्यांना शिष्यवृत्ती वितरण
अलिबाग, ता. २९ (वार्ताहर) : राष्ट्रीय केमिकल्स अँड फर्टिलायझर्स लिमिटेड (आरसीएफ)तर्फे निगमित सामाजिक दायित्व (सीएसआर) उपक्रमांतर्गत थळ युनिट परिसरातील जवळच्या गावांतील अनुसूचित जाती व अनुसूचित जमाती प्रवर्गातील गरजू व वंचित विद्यार्थ्यांना शिष्यवृत्ती प्रदान करण्यात आली.
आरसीएफ वसाहत येथे आयोजित विशेष समारंभात विद्यार्थ्यांना शिष्यवृत्तीचे वितरण करण्यात आले. या कार्यक्रमास आरसीएफचे कार्यकारी संचालक नितीन हिरडे, वरिष्ठ अधिकारी, संबंधित शाळांचे मुख्याध्यापक तसेच विद्यार्थ्यांचे पालक मोठ्या संख्येने उपस्थित होते.
या उपक्रमाचा मुख्य उद्देश आर्थिकदृष्ट्या दुर्बल घटकांतील विद्यार्थ्यांना शैक्षणिक संधी उपलब्ध करून देणे व त्यांच्या उज्ज्वल भविष्यासाठी प्रोत्साहन देणे हा आहे. यावेळी बोलताना कार्यकारी संचालक नितीन हिरडे यांनी, शिक्षण हे समाज परिवर्तनाचे सर्वात प्रभावी साधन आहे. आरसीएफ आपल्या सीएसआर उपक्रमांद्वारे समाजातील वंचित घटकांना सक्षम करण्यासाठी कटिबद्ध आहे, असे सांगितले.
या उपक्रमामुळे आर्थिक अडचणींवर मात करत विद्यार्थ्यांना शिक्षणाची नवी संधी मिळणार असून त्यांच्या शैक्षणिक प्रगतीस चालना मिळणार आहे.