गतिरोधक नसल्याने अपघाताचा धोका
नेरूळ, ता.२९(बातमीदार) : महापालिकेकडून नेरूळ आणि सानपाडा नॉडला जोडणाऱ्या रस्त्याचे डांबरीकरण करण्यात आले आहे. डांबरीकरणाचे काम जवळपास पूर्ण झाले असले तरी या रस्त्यावरील चौक, शाळा परिसरातील हटवलेले गतिरोधक नव्याने बसवलेले नाहीत. यामुळे वाहनांचा वेग वाढला असून अपघाताची शक्यता निर्माण झाली आहे. याकडे महापालिकेचे दुर्लक्ष झाल्याचा आरोप नागरिकांनी केला आहे.
नेरूळ आणि सानपाडा नॉडला जोडणाऱ्या रस्त्यावरून वाहनांची मोठ्या प्रमाणावर वर्दळ असते. नेहरू सेक्टर दोन मधील राजीव गांधी उड्डाण पुलापासून सानपाडा कारखेडला जाणाऱ्या रेल्वे रुळापर्यंत रस्त्याच्या डांबरीकरणाचे काम महापालिकेने हाती घेतले होते. विविध चौक, सोसायत्या, शाळा आदींजवळ यापूर्वी गतिरोधक होते. यामुळे वाहनांचा वेग नियंत्रणात होता. आणि विद्यार्थी, नागरिकांना रस्ता ओलांडणे देखील सोयीचे होते. परंतु डांबरीकरणाचे काम सुरू करताना गतिरोधक हटविण्यात आले होते. ते गतिरोधक पुन्हा बसवण्यात यावेत, अशी मागणी नागरिकांकडून होत आहे.