उल्हासनगर, ता. २९ (वार्ताहर) : कॅम्प ४ येथील श्रीरामनगरमधील प्रसिद्ध श्रीराम मंदिरात राम नवमीचा उत्सव मोठ्या उत्साहात आणि भक्तिभावाने साजरा करण्यात आला. चैत्र वद्य नवमीनिमित्त दुपारी १२ वाजता प्रभू श्रीरामांचा जन्मोत्सव सोहळा पार पडला. या वेळी मंदिर परिसर ‘जय श्रीराम’च्या घोषणांनी दुमदुमून गेला होता. श्रीराम भजनी मंडळाच्या भजनांनी वातावरण अधिक भक्तिमय झाले, तर पारंपरिक पाळणा गायनाने भाविक मंत्रमुग्ध झाले. प्रभूंच्या मूर्तीवर पुष्पवृष्टी करत उपस्थितांना सुंठवडा व प्रसादाचे वाटप करण्यात आले. सायंकाळी श्रीरामनगर उत्सव समितीच्या वतीने शोभायात्रा काढण्यात आली. पारंपरिक वेशभूषेत सजलेले रामभक्त, ढोल-ताशांच्या गजरात आणि भगव्या ध्वजांच्या साक्षीने शिस्तबद्ध पद्धतीने मार्गक्रमण करत होते. ठिकठिकाणी रांगोळ्या व पुष्पवृष्टी करून शोभायात्रेचे स्वागत करण्यात आले. सोहळ्यात शिवसेना नगरसेवक अरुण आशान, इंदिरा पाटील, संगीता सपकाळे, माजी महापौर लीलाबाई आशान, समाजसेवक निखिल पाटील यांच्यासह अनेक मान्यवर उपस्थित होते.