तेल सांडल्याने वाहतूक विस्कळित

ठाणे, ता. ३० : कोपरी परिसरातील बारा बंगला येथे सोमवारी (ता. ३०) सकाळी सुमारे ९.४८ वाजण्याच्या सुमारास रस्त्यावर ऑइल सांडल्याने काही काळ वाहतुकीत अडथळा निर्माण झाला होता. सुदैवाने या घटनेत कोणतीही दुखापत झाली नाही.
कोपरी बारा बंगला परिसरातील बंगला क्रमांक १३ जवळ रस्त्यावर मोठ्या प्रमाणात तेल सांडले असल्याची माहिती दीपक म्हात्रे यांनी ठाणे महापालिका आपत्ती व्यवस्थापन कक्षेला दिली. ती माहिती मिळताच वाहतूक पोलिस व आपत्ती व्यवस्थापन कक्षाचे कर्मचारी तातडीने घटनास्थळी दाखल झाले. त्यांनी तत्परतेने रस्त्यावर सांडलेल्या तेलावर माती टाकून तो रस्ता सुरक्षित केला. त्यानंतर काही वेळातच वाहतूक सुरळीत झाल्याचे आपत्ती व्यवस्थापन कक्षेने सांगितले.