नेरूळमध्ये पदपथावरील मातीचे ढिगारे तातडीने हटवण्याची मागणी
महावितरणच्या कामानंतर नागरिकांना अडथळा; महापालिकेकडे निवेदन
नेरूळ, ता. ३० (बातमीदार) : नेरूळ सेक्टर ६ परिसरात महावितरणच्या कामानंतर पदपथावर टाकण्यात आलेले माती व दगडांचे ढिगारे तातडीने हटवावेत, अशी मागणी सामाजिक कार्यकर्ते संदीप खांडगेपाटील यांनी महापालिका आयुक्त डॉ. कैलास शिंदे यांच्याकडे निवेदनाद्वारे केली आहे.
सीव्ह्यू सोसायटी ते मेरेडियन टॉवर तसेच शिवम सोसायटीलगत केबल टाकण्यासाठी करण्यात आलेल्या खोदकामानंतर मातीचे ढिगारे पदपथावरच ठेवण्यात आले आहेत. महिना उलटूनही ते हटवले नसल्याने नागरिकांना चालणे कठीण झाले असून परिसरात अस्वच्छता निर्माण झाली आहे.
महापालिकेच्या दुर्लक्षामुळे स्थानिक रहिवाशांना त्रास सहन करावा लागत असल्याची नाराजी व्यक्त होत आहे. संबंधित यंत्रणांनी तातडीने कारवाई करावी, अशी मागणी करण्यात आली आहे.