मिठी नदीचे ९० कोटी रुपये पुलासाठी वळविण्यास विरोध

सकाळ वृत्तसेवा
मुंबई, ता. ३० ः मिठी नदीतील गाळ काढण्याचे काम २००५पासून सुरू आहे. मात्र, मिठी नदीसाठी असलेला निधी उड्डाणपुलाच्या कामासाठी वापरण्यात येणार आहे. हा निधी वळवण्याचा पायंडा पडेल. त्यामुळे या प्रस्तावाला पालिकेच्या विरोधी पक्षनेत्या किशोरी पेडणेकर यांनी सभागृहात विरोध केला. काँग्रेसनेही उपसूचनेद्वारे या प्रकाराला विरोध केला. विरोधकांच्या विरोधानंतर उपसूचना नामंजूर करीत महापौर रितू तावडे यांनी प्रस्ताव मंजूर केल्याने सभागृहात गदारोळ झाला.
आतापर्यंत कुठल्या विभागातील निधी वळता केला याची सविस्तर माहिती सभागृहाला द्यावी, अशी उपसूचना काँग्रेसचे गटनेते आश्रफ आझमी यांनी सभागृहात केली आणि विरोधी पक्षनेत्या पेडणेकर यांना पाठिंबा दिला. विरोधकांच्या विरोधानंतर उपसूचना नामंजूर करीत महापौर रितू तावडे यांनी प्रस्ताव मंजूर केल्याचे जाहीर केले. पूर्व उपनगरातील सायन पनवेल द्रुतगती मार्गावरील एम पूर्व विभागातील महाराष्ट्र नगर येथे सब-वेजवळील टी जंक्शन येथे उड्डाणपूल उभारण्यात येणार आहे. मिठी नदीच्या कामासाठी असलेला ९० कोटींचा निधी या उड्डाणपुलाच्या कामासाठी वळता करण्यात येणार आहे. मिठी नदीच्या कामासाठी असलेला पैसा का वापरता, असा सवाल करीत विरोधी पक्षनेत्या पेडणेकर यांनी प्रस्तावाला विरोध केला. उड्डाणपुलाचे काम होऊ नये म्हणून उद्धव ठाकरे यांच्या शिवसेनेचे नगरसेवक विरोध करीत असल्याची टीका भाजपचे नगरसेवक प्रवीण छेडा यांनी केली. दुसरीकडे ‘९० कोटी रुपये पुलाच्या कामासाठी वळता करण्याचे कारण काय,’ असा सवाल आझमी यांनी या वेळी केला.