क्रीडा भवनासाठी कामगार एकत्र
पालिकेच्या क्रीडा भवनाचा १०० वर्षांचा इतिहास पुसण्यास विरोध

सकाळ वृत्तसेवा
मुंबई, ता. २ ः मुंबई महापालिकेच्या मुख्यालयासमोर पालिकेच्या क्रीडा भवनाच्या जागी टाऊन हॉल उभारण्याचा घाट घातला जात आहे. क्रीडा भवनाचा १०० वर्षांचा इतिहास पुसला जाणार असून, त्याला पालिकेतील क्रीडा भवनातील सेवानिवृत्त कामगारारांनी तीव्र विरोध केला आहे. आता क्रीडा भवन वाचविण्यासाठी कामगार एकत्र येत आहेत. क्रीडा भवन वाचविण्याचे साकडे त्यांनी प्रशासनाला घातले आहे.

पालिकेचे क्रीडा भवन शताब्दी वर्ष साजरे करण्यासाठी सभासद, खेळाडू, आजीव सभासद, नगरसेवक यांची संयुक्त बैठक सोमवारी (ता. ३०) पालिका मुख्यालयासमोरील मुख्य क्रीडा भवन, बॅडमिंटन कोर्ट येथे आयोजित करण्यात आली होती. या वेळी क्रीडा भवनाच्या जागी टाऊन हॉल उभारण्याचा पालिका प्रशासनाने घेतलेल्या निर्णयाचा विरोध करण्यात आला. महापालिका कर्मचाऱ्यांसाठी पालिकेने १९२६ मध्ये क्रीडा भवनाची स्थापना केली होती. या क्रीडा भवनातून अनेक कर्मचाऱ्यांनी राष्ट्रीय स्तरावर नेत्रदीपक कामगिरी केली. त्यामुळे सध्याचे क्रीडा भवन कोणत्याही परिस्थितीत गमवायचे नाही, असा ठराव बैठकीत घेण्यात आला. क्रीडा भवनचे १२ हजार सदस्य असून, अडीच हजारांपेक्षा जास्त आजीव सदस्य आहेत. यात नगरसेवकांचाही समावेश आहे. त्यामुळे सध्याची क्रीडा भवनाची इमारत वाचवण्यासाठी सर्व कर्मचाऱ्यांनी एकत्र येऊन प्रशासनाच्या विरोधात लढा देण्याचा निर्णय घेतला आहे.
--------
एक इंचही जागा न सोडण्याचा ठराव
क्रीडा भवनाच्या जागी टाऊन हॉल बांधा अथवा महापालिका सभागृह, पण विविध क्रीडा प्रकारासाठी आरक्षित असलेल्या सध्याच्या जागेपैकी एक इंचही जागा सोडणार नाही. नवीन इमारत बांधल्यानंतर क्रीडा भवनासाठी जागा उपलब्ध करण्यात यावी, अशी मागणीही प्रशासनाकडे करण्यात यावी, असा ठरावही मंजूर करण्यात आला आहे.
--------------