नफ्याच्या प्रलोभनातून अभियंत्याला गंडा
बोईसर, ता. १ (वार्ताहर) : बोईसर परिसरात जास्त परताव्याचे प्रलोभन दाखवत एका आयटी इंजिनिअरची २९ लाख ७७ हजार २०५ रुपयांची ऑनलाइन फसवणूक झाली आहे. याप्रकरणी बोईसर पोलिस ठाण्यात गुन्हा दाखल करण्यात आला आहे.
बोईसर पूर्वेतील टाटा हाउसिंग शुभगृह सोसायटीत राहणारे शुभम भोळे (वय २७) यांच्याशी ९ ते २० डिसेंबर २०२५ दरम्यान ‘मेघा’ नावाने एका अज्ञात महिलेने संपर्क साधला. मोबाईलद्वारे संवाद साधत तिच्याकडून विश्वास संपादन करण्यात आला. यानंतर फिर्यादीला व्हॉट्सॲपवर लिंक पाठवून त्यावर अकाउंट तयार करण्यास सांगण्यात आले. विविध हॉटेल्सच्या जाहिरातींवरील ‘टास्क’ पूर्ण केल्यास गुंतवणुकीवर अधिक परतावा मिळेल, असे प्रलोभन दाखवण्यात आले. पुढे टेलिग्रामवरील ग्रुपमध्ये सहभागी करून पैसे गुंतवण्यास प्रवृत्त केले. त्यानुसार विविध बँक खाते, यूपीआयतून २९ लाख ७७ हजार २०५ रुपये जमा करून घेतल्यानंतर आरोपींनी फसवणूक केल्याचे स्पष्ट झाले. याप्रकरणी भारतीय न्याय संहिता कलम ३१८ (४), ३१९ (२) तसेच माहिती तंत्रज्ञान अधिनियम २०००च्या कलम ६६(ड) अन्वये गुन्हा दाखल केला आहे.