महावीर जयंतीचा मनोरमध्ये उत्साह
मनोर, ता. १ ः भगवान महावीर यांची जयंती मनोर येथे भक्तिमय वातावरणात साजरी करण्यात आली. यानिमित्त जैनबांधवांकडून बाजारपेठेतून मिरवणूक काढण्यात आली. जैन देरासर येथून भगवान महावीरांची प्रतिमा सजवलेल्या बग्गीत स्थापित करून मिरवणुकीला सुरुवात करण्यात आली. बाजारपेठेतून निघालेली ही मिरवणूक बस स्थानकाला वळसा घालून मशीद गल्ली मार्गे पोलिस ठाणे परिसरातून पुन्हा जैन देरासर येथे पोहोचली.
मिरवणुकीत बॅण्ड पथकाच्या तालावर जैनबांधवांनी उत्साहाने ठेका धरला. पारंपरिक वेशभूषेत सजलेली लहान मुले मुली, डोक्यावर राजस्थानी फेटे परिधान केलेले पुरुष तसेच चुंदडी साड्यांमधील महिला यांचा सहभाग मिरवणुकीला विशेष रंगत आणणारा ठरला. या वेळी उद्योजक सुमति जैन, प्रकाश जैन, महावीर मेहता, विजय सोलंकी, सुरेश जैन, विपुल राठोड, सचिन जैन, भरत जैन, भेरूलाल जैन, रुपेश मेहता तसेच ग्रामपंचायत सरपंच, उपसरपंच, सदस्य, गावातील प्रतिष्ठित नागरिकांनी सहभाग घेतला.