तुर्भे, ता. १ (बातमीदार) : नवी मुंबईच्या शिक्षण क्षेत्रात महत्त्वपूर्ण पाऊल उचलत महापालिकेने आपल्या तीन शाळांमध्ये सीबीएसई मंडळाशी संलग्न शिक्षण सुरू केले आहे. महासभेच्या मान्यतेनंतर हा निर्णय अमलात आणण्यात आला आहे. यामुळे शहरातील विद्यार्थ्यांना दर्जेदार व आधुनिक शिक्षणाची संधी उपलब्ध झाली आहे.

नेरूळ सेक्टर-५०मधील शाळा क्र. ९३, कोपरखैरणे सेक्टर-११ येथील शाळा क्र. ९४ आणि सारसोळे परिसरातील शाळा क्र. ९८ या ठिकाणी सीबीएसई अभ्यासक्रम राबविण्यात येत आहे. या शाळांमध्ये २०२६-२७ या आगामी शैक्षणिक वर्षासाठी नर्सरी ते नववीपर्यंतच्या वर्गांमध्ये रिक्त जागांवर प्रवेश प्रक्रिया सुरू करण्यात आली आहे. विशेष म्हणजे ही प्रवेश प्रक्रिया निःशुल्क ठेवण्यात आली असून, आर्थिकदृष्ट्या दुर्बल घटकांतील विद्यार्थ्यांनाही दर्जेदार शिक्षण मिळावे, हा महापालिकेचा उद्देश आहे. त्यामुळे पालिका कार्यक्षेत्रातील जास्तीत जास्त नागरिकांनी या सुविधेचा लाभ घ्यावा, असे आवाहन महापालिकेच्या वतीने करण्यात आले आहे. या प्रवेश प्रक्रियेबाबतची माहिती महापालिकेच्या संकेतस्थळावर उपलब्ध करून देण्यात आली आहे.

पालकांना दिलासा
महापालिकेच्या या उपक्रमामुळे खासगी शाळांवरील अवलंबित्व कमी होण्यास मदत होणार आहे. तसेच सर्वसामान्य पालकांना मोफत आणि गुणवत्तापूर्ण शिक्षणाचा पर्याय उपलब्ध झाला आहे. यासह विद्यार्थ्यांच्या सर्वांगीण विकासासाठी आधुनिक सुविधा, प्रशिक्षित शिक्षकवर्ग आणि सीबीएसई अभ्यासक्रमाचा लाभ मिळणार असल्याने या शाळांना पालकांकडून चांगला प्रतिसाद मिळण्याची शक्यता व्यक्त केली जात आहे.