श्री हनुमान मंदिराचा लोकार्पण सोहळा उत्साहात

घाटकोपर, ता. १ (बातमीदार) : चांदिवली विधानसभा मतदारसंघातील प्रभाग क्र. १६१ अंतर्गत टिळकनगर, साकीनाका येथे नवक्रांती युवा मित्र मंडळाच्या पुढाकारातून जीर्णोद्धार करण्यात आलेल्या भव्य व सुसज्ज श्री हनुमान मंदिराचा प्राणप्रतिष्ठा व लोकार्पण सोहळा मोठ्या उत्साहात झाला. शिवसेना चांदिवली विधानसभा प्रभागाच्या वतीने आयोजित या कार्यक्रमाला भाविकांची मोठी उपस्थिती लाभली होती.
या सोहळ्याचे आयोजन आमदार दिलीप लांडे यांच्या प्रयत्नातून व त्यांच्या हस्ते करण्यात आले. बुधवार (ता. १) सकाळी १० वाजता श्री गणपती मंदिर ते हनुमान मंदिर, टिळकनगर अशा भव्य कलश मिरवणुकीने कार्यक्रमाची सुरुवात झाली. या मिरवणुकीत स्थानिक भाविक व महिला मोठ्या संख्येने सहभागी झाल्या होत्या. यानंतर सकाळी ११.३० वाजता गणेश व भोलेनाथ हाउसिंग सोसायटी, अनिस कंपाउंड, टिळकनगर, साकीनाका येथे जीर्णोद्धारित श्री हनुमान मंदिरात प्राणप्रतिष्ठा व कलशारोहण विधी वैदिक मंत्रोच्चारात झाला.