जत्रोत्सवात कुस्त्यांचा जंगी आखाडा
पालखी मिरवणुकीने तिसगावचा परिसर दुमदुमला

कल्याण, ता. २ (बातमीदार) : कल्याण पूर्व भागातील श्रद्धास्थान असलेल्या तिसगाव येथील प्रसिद्ध जरीमरी तिसाई देवस्थानचा चैत्री जत्रोत्सव गुरुवारपासून (ता. २) मोठ्या उत्साहात सुरू झाला आहे. दोन दिवस चालणाऱ्या या उत्सवासाठी तिसगाव ग्रामस्थ मंडळ आणि नियोजन समितीच्या वतीने जय्यत तयारी करण्यात आली आहे. या यात्रेचे वैशिष्ट्य म्हणजे येथे कुस्तीचे सामने आयोजित केले जातात.

गुरुवारी पहाटे ६ वाजता देवीचा अभिषेक आणि विधिवत पूजा करून उत्सवाला प्रारंभ झाला. सकाळपासूनच भाविकांनी दर्शनासाठी मंदिरात मोठी गर्दी केली होती. उत्सवाचे मुख्य आकर्षण असलेली जरीमरी तिसाई मातेची भव्य पालखी मिरवणूक गुरुवारी सायंकाळी काढण्यात आली, ज्यामध्ये परिसरातील नागरिक मोठ्या संख्येने सहभागी झाले होते. सायंकाळी ७.३० वाजता हनुमान जयंतीनिमित्त विशेष धार्मिक व सांस्कृतिक कार्यक्रम होणार आहेत. या दोन दिवसांच्या सोहळ्यात हजारो भाविक उपस्थित राहण्याची शक्यता असून, सर्व भाविकांनी दर्शनाचा आणि महाप्रसादाचा लाभ घ्यावा, असे आवाहन तिसगाव ग्रामस्थ मंडळाच्या वतीने करण्यात आले आहे.

महाप्रसादाचे आयोजन
जत्रोत्सवाच्या दुसऱ्या दिवशी, शुक्रवारी (ता. ३) सकाळी अभिषेक, पूजा आणि आरतीचे कार्यक्रम पार पडतील. दुपारी १२ वाजता सर्व भाविकांसाठी महाप्रसादाचे आयोजन करण्यात आले आहे. तसेच, कुस्तीप्रेमींसाठी दुपारी ४ वाजल्यापासून गावदेवी मंदिराच्या प्रांगणात कुस्त्यांच्या जंगी आखाड्याचे आयोजन केले आहे. यामध्ये अनेक नामवंत मल्ल आपले कसब दाखवणार आहेत.